Hlaupahópur FH

Síðastliðinn fimmtudag tóku fjölmargir HHFH-félagar þátt í miðnæturhlaupinu og var árangurinn framar björtustu vonum. Nær allir voru að hlaupa á persónulegum tímum og nokkrir að lenda á verðlaunapalli. Væri of langt mál að telja alla upp hér í þessari færslu en eftirfarandi unnu til verðlauna:
5km
Fjóla Rún Þorleifsdóttir, 2. sæti í flokki kvenna 19-39 ára á 23,51
Svana Huld Linnet, 3. sæti í flokki kvenna 40-49 ára á 23,18 mín
10km
María Kristín Gröndal, 2. sæti í flokki kvenna og 2 sæti í flokki 19-39 ára á 38,24 mín.
Erla Eyjólfsdóttir, 3. sæti í flokki 50-59 ára á 46,46 mín.

Óska þjálfarar félögum innilega til hamingju með árangurinn.

Var gaman að sjá þá góðu stemningu sem var á keppnisstað og hversu einbeittir hlaupararnir voru að ná góðum tímum. Miða við þennan árangur þá stefnir í stórbætingar síðar á sumrinu.

Mörg keppnishlaup eru framundan og verður gaman að sjá árangurinn á næstu vikum.
Við hvetjum sem flesta til að mæta á æfingar og hafa gaman af skemmtilegum félagsskap og gæðaæfingum.

Um liðna helgi keppti María Kristín með landsliði Íslands í Evrópubikarnum í frjálsum íþróttum. Hún keppti í 3000m hindrunarhlaupi og hljóp á 11,52mín og varð nr. 7 sem er frábær árangur. Eru þjálfarar ákaflega stoltir af þessum árangri hennar og lofar þetta góðu fyrir framtíðina.

Annars eru margir í HHFH búnir að skrá sig í miðnæturhlaupið á fimmtudag og ríkir mikil eftirvænting eftir þessu fjölmenna hlaupi sem býður upp á hraða tíma og skemmtilega keppni.

Næstkomandi laugardag verða Pétur og Steinn á frjálsíþróttamóti á Vík í Mýrdal og Hrönn verður erlendis þannig að hópurinn verður þjálfaralaus. Hins vegar eru félagar það röggsamir að það ætti ekki að koma að sök og verður eflaust tekið á því að venju.

sjáumst hress á næstu æfingu.

Heldur fámennt var en góðmennt á síðustu æfingu á laugardag og eflaust margir notað hvítasunnuhelgina til ferðalaga og útivistar. Það er þó ljóst að þrátt fyrir að félagar missi af æfingum þá má sjá að þeir hlaupa sjálfir samkvæmt hlaupadagbókinni á www.hlaup.com
Eru nýjir félagar hvattir til að skrá sig og halda þannig utan um æfingar og keppnir og sjá þannig þær framfarir sem verða.

Nokkrir félagar tóku þátt í 3/5/7 Tindahlaupinu og stóðu sig mjög vel. Enn hafa ekki úrslit verið birt en Friðleifur sigraði í 7 tinda vegalengdinni þrátt fyrir að hafa hlaupið á fimmta km aukalega. Þess má geta að Friðleifur keppti fyrr í vikunni í Heilsuhlaupi Krabbameinsfélagsins og náði þar öðru sæti.
Hópurinn átti einnig annan sigurvegara um liðna helgi en Helga Halldórsdóttir sigraði í kvennaflokki í Álafosshlaupinu. Óskum við þeim innilega til hamingju.

Þjálfarar vilja minna félaga á aukaæfingu á mánudögum en þá hittast félagar og taka létt hlaup frá Kaplakrika.
Sjáumst hress á næstu æfingu.

Undanfarið hafa félagar í HHFH gert víðreist og keppt með frábærum árangri. Í liðinni viku varð Friðleifur í verðlaunasæti í Leiknishlaupinu (10km) og Hjördís Ýr gerði sér lítið fyrir og sigraði í kvennaflokki í Grafningshlaupinu sem var 25km utanvegahlaup. Öll úrslit úr þessum hlaupum má sjá inn á www.hlaup.is
Einnig tóku nokkrir félagar þátt í hálf ólympískri þraut og voru þær Kristín Högnadóttir og Svana Huld Linnet í verðlaunasætum í sínum aldursflokkum. Það er ánægjulegt að sjá hvað félagar eru að uppskera vel eftir góðar æfingar í vetur og ef fer fram sem horfir verður sumarið met bætingasumar. Myndir og úrslit úr þrautinni er hægt að skoða á www.3sh.is

Þjálfarar vilja minna á mánudagsæfingar þar sem áherslan er lögð á létt hlaup og góðar teygjur. Í dag mánudaginn 6. júní verða þjálfarar ekki á æfingu þar sem þeir eru uppteknir en vonandi mæta félagar að venju. Á þriðjudagsæfingum er mikilvægt að finna sér hæfilegan hraða til að hlaupa á og þeir sem hafa keppt í sumar ættu að vera búnir að finna sér viðmið.

Sjáumst hress á næstu æfingu

Síðastliðinn laugardag kepptu nokkrir félaga okkar í HHFH í Valshlaupinu og stóðu sig með ágætum.
María Kristín sigraði í kvennaflokki og Friðleifur varð nr. 4  í karlaflokki. Auk þess voru margir að vinna verðlaun í sínum aldursflokkum og setja persónuleg met. Innilega til hamingju öll sem tókuð þátt og stóðuð ykkur frábærlega vel.
Öll úrslit má skoða inn á www.hlaup.is

Þjálfarar vilja minna félaga á að á mánudögum hittast nokkrir félagar í Kaplakrika og hlaupa létt. Er það von okkar að sem flestir mæti og bæti þessari æfingu inn í æfingaáætlunina.

Framundan eru nokkuð mörg skemmtileg keppnishlaup og hvetja þjálfarar félaga til að vanda valið þegar kemur að hlaupum. Óhætt er að mæla með, t.d. Akraneshlaupinuþann 11. júni, Miðnæturhlaupinu þann 23. júni, o.m.fl. Annars er hægt að skoða hlaupadagskránna inn á www.hlaup.is
Um næstu helgi fer fram hálf ólympísk sprettþraut hér í Hafnarfirði undir merkjum 3SH. Fjölmargir úr HHFH taka þátt og eru félagar hvattir til að mæta og horfa á en fremstu menn eru rúman klukkutíma að ljúka þrautinni. Ef einhverjir eru tilbúnir að vera teljarar á bakka í ci. 15 mín þá endilega látið Pétur eða Stein vita.

Sjáumst á næstu æfingu – komaso

Æfingar ganga vel að venju og aldrei þessu vant var ekkert keppnishlaup á dagskrá þessa helgina. Góð mæting hefur verið á æfingar og hafa þjálfarar ákveðið að bjóða framvegis upp á aukahlaupaæfingu kl. 17:30 frá Kaplakrika á mánudögum. Undanfarið hafa nokkrir félagar verið að mæta á þeim tíma og þeir sem vilja hlaupa í góðum hópi eru hvattir til að mæta. Er það einkum mikilvægt fyrir þá sem stefna á lengri keppnishlaup í sumar.

Þar sem margir í hópnum eru farnir að hlaupa vel yfir 20km um helgar þá er mikilvægt að menn næri sig á hlaupum, t.d. noti orkugel eða hafi vöka meðferðis. Þess má geta að nú er byrjað að selja Powerbar-vörurnar (www.powerbar.com) á Íslandi í fyrsta skipti en þær eru sniðnar að þörfum þeirra sem eru í úthaldsíþróttum. Félagar í hlaupahóp FH fá 15% afslátt af vörunum sem eru seldar hjá EAS í Suðurhrauni í Garðabæ. Sjá nánar inn á www.eas.is Einnig er þar næringarráðgjafi á staðnum sem veitir mönnum ráðgjöf um hvað henti. Þjálfarar eru einnig tilbúnir að leiðbeina félögum hafi þeir spurningar um hvernig best sé að haga næringu þegar kemur að æfingum og keppni.

Sjáumst á næstu æfingu
komaso

Fín mæting hefur verið á æfingar undanfarið og er greinilegt að hraðaæfingar á brautinni eru efst á vinsældalistanum (fara fram á þriðjudögum). Smá saman mun æfingamagnið aukast hjá þeim sem stefna á löngu vegalengdirnar þegar líður á sumarið og er mikilvægt að bæta við aukaæfingum, t.d. hlaupa rólegt á miðvikudögum og mánudögum.

Framundan eru fjölmörg keppnishlaup (sjá hlaupadagskrá inn á www.hlaup.is) og eru félagar hvattir til að keppa til að fá hugmynd um hlaupagetuna. Útfrá þeim tímum sem nást í keppnum er hægt að setja upp hraðann sem á að hlaupa á á æfingum.

Þeir sem stefna á keppni í Köln eru hvattir til að skrá sig sem fyrst og ganga frá hótelinu. Mikill hugur er í hópnum sem stefnir á keppni í hálfu eða heilu maraþoni. Svo má ekki gleyma því að nokkir munu taka þátt í Berlínarmaraþoninu sem er helgina á undan.

Sjáumst á næstu æfingu

Á sunnudag fór fram Hérahlaup Breiðabliks og tóku nokkrir úr hlaupahópnum þátt. Í 10km kvenna sigraði María Kristín og í karlaflokki varð Björn Traustason í öðru sæti. Í flokki 16 ára og yngri – konur sigraði svo Silja Rós Pétursdóttir (dóttir Péturs þjálfara). Í 5km varð Birna Björsdóttir í öðru sæti og í karlaflokki varð Hinrik Jón Stefánsson í þriðja sæti.

Öll úrslit og myndir frá hlaupinu má sjá inn á www.hlaup.is en nokkrir til viðbótar við ofangreinda hlaupara tóku þátt og stóðu sig vel.
Er þessi árangur glæsilegur og enn og aftur eru félagar að bæta sig vel þrátt fyrir erfitt færi þennan dag.

Í dag 3. maí förum við á brautina og tökum góða tempóæfingu. Sjá undir æfingaáætlanir. Vilja þjálfarar enn og aftur ítreka mikilvægi þess að hlaupa ekki of hratt í upphitun. Upphitun á að vera róleg áður en tempó/sprettir hefjast.

Þar sem góða veðrið hefur loksins gert vart við sig stefnum við á að hittast upp á braut framvegis en ekki inni í Kaplakrika.
Sjáumst hress í góða veðrinu í dag.

Margir  í HHFH hafa sett sér stór markmið fyrir sumarið og ætla að hlaupa allt frá 5km upp í maraþon í keppni. Þetta kallar á ákveðinn undirbúning sem er mjög mismunandi eftir vegalengd. Þeir sem ætla að keppa t.d. í maraþoni í haust þurfa að fylgja u.þ.b. 16 vikna maraþonæfingaáætlun og er þá miðað við nokkuð góðan grunn. Fyrir hálft maraþon er svipaður undirbúningstími en styttri vegalengdir hlaupnar á æfingum. Það sama gildir um aðrar vegalengdir. Það er mikilvægt að félagar noti McMillan-hlaupareiknivélina sem þjálfarar hafa vísað á til að finna út á hvaða hraða á að hlaupa mismunandi æfingar. Á næstunni munu þjálfarar setja upp æfingaáætlanir miða við í hvaða vegalengdum á að toppa í sumar/haust. Verða æfingar miðaðar við 5/10km hóp, ½ maraþonhóp og maraþonhóp. Fjölmargir í hópnum hafa sett stefnuna á Köln í byrjun október í maraþon og einnig mun stór hópur keppa í Reykjavíkurmaraþoninu og nokkrir í Berlínarþoninu. Því er ekki seinna vænna en að huga að æfingaundirbúningi og byrja undirbúning tímanlega.

Framundan er vormaraþonið og ætla nokkrir úr hópnum að taka þátt. Einnig fer fram Hérahlaup Breiðabliks þann 1. maí næstkomandi og er brautin þar kjörin til bætinga. Þessi fyrstu vorhlaup eru oft góð æfing og má nota þau til að leggja línurnar fyrir sumarið.

Í liðinni viku tóku fjölmargir félagar þátt í víðavangshlaupi ÍR og einnig í víðavangshlaupi Hafnarfjarðar og var árangur með ágætum þrátt fyrir leiðindaveður.

Smá seinkun varð á greiðsluseðlum vegna æfingagjalda en þau ættu að berast í heimabankann í þessari viku og vonum við að viðtökur verði góðar að venju.

Sjáumst á næstu æfingu tilbúin að taka á því : )